FATEH SINGH SYANA HARUL

हारूल फतेह सिंह स्याणा ऊबो डांडो मुईलो ऊदो बेनाडो गाडो । फतु स्याणा तेरो शिलगाव ले सुने शो हारो ।। चारों खती कडमाणीदा स्याणा तेरा बोलबाला । तेरे नोटा नावका स्याणा मुलीकन्दा हाला ।। आछे काम के फतु स्याणा लोगों देओ सबासी ले । बारीया को बिशु मुईले लाअते दुनिया आओ तमासी ले ।। सातो गांव शिलगाव दे स्याणा गांव जोशे नाते । मुईया ना सुईया स्याणा तु सबु के साथे ।। मशका रजाणू सताडी चोउतो हरटाडी । कोटिया जो त्यने होदो सातओ मंगटाडी ।। उबिया था पुरियाणो ले हारो लेआ उड़ाओ ले । हगाटे की रईणो लेई भकाणो की ध्याणो ले ।। ऐशी चलाया चालती स्याणा ऊमीरा जाओ । बापो केशर सिंह का स्याणा राखी देणा नाव ।। मां छोड़ा घातों देवी के ताऊ जोशा सपुतो । होणा चाईता हर मां के ताऊ जोशा पुतो ।। चाचा बलवीर ताऊके दियाओ बापो जोशा सहारा ए । सदा ऊंचा चाईता बेटा नाव ले हमारा एक ।। राजनीति ठेकेदारी दो स्याणा तेरा ऊंचा नांव । इतिहासो दो लिखिए तेरो मशका को गांव ।। लोगु डाई समाजो जोड़े तु आपू डाई तोड़े । गांगे गरीबु के मनो स्याणा तु कोदी करें ना थोड़े ।। ऊबो तेरी मशको ले चोडू शो कोलो ऐ । तेरो हदों फतु स्याणा ऊपीनो बोलो ऐ ।। घरो आगे फतु स्याणा देवआरो पाणी । ओशु के सालादा जोजोडा बारीया का देणा बाणी ।। बातो शुणी खतोदी स्याणा सबिया होए खुशो । बामिणा बोलु पतिया दे दी झाजेडे रो दुसरो ।। सिंह खोजो कागीडो ले कनिया तुडो ऐ । बारो पड़ा शुक्ररो मिना बोशाओ जुडो ऐ ।। किछे बातो फतु स्याणा थोईना अधुरी । खाडु बाकिरे आअदे लागे डाई विशो हुई पुरी ।। सारे त्यारो कि जुकिमो स्याणा तेरे मशका जुड़ो । खतो तेरी बाजदीया आओ गुडकू शा गुंडों ।। दिओ ध्याणी पोई पाऊणे रोए तमासी आई ऐ । ऐशना रिवाजों स्याणा दुनिया दा चाई ऐ ।। लेखक – अतर सिंह चौहान